Latinised Hymns

All creation groans and travails:



J.M. Neale (1866)

Gemit mundus et laborat;
laborantem tu vides:
quippe hominum et mundi
Deus aeque solus es.

Parce nobiscum dolenti
nec culpando pecori:
culpa nostra pereunti
prosit nostra prex ei.

Nostrum rus adflictum clemens
atque amans inspexeris
angeloque perditori
"Ohe! iam" dic "est satis!"

Ut casis convallibusque,
pascuis sit otium;
nostrum, sicut in Aegypto,
peste libera solum.

Sed in primis miserescens,
Deo Nate, respice
specie tua creatos,
emptos tuo sanguine.

Cum favore votum audi
surgens turi simile
desperante tua plebe
ad Thronum Clementiae,

viduis favens et orbis,
quis nec ops nec sunt opes:
nec ops, nisi quid tu parces
calathis, nec ulla spes,

ut, ex corde tui cantum
dum cultores iterant,
nostrae per vias bidentes
milliens parturiant;

sani boves et securi
tollant fortes onera,
neve sit quod tum queramur
dempta pestilentia;

et tuis cum pace terrae
universis denique
dona tecum sempiternam
partem, Trine at Unice.